БИШКЕК, 24-дек. — Sputnik. Бишкекте январь айында муз скульптураларынын "Назик кооздук" аталышындагы көргөзмөсү өтөт. Бул тууралуу шаардык муниципалитеттин маалымат кызматынан билдиришти.
Көргөзмө 5-13-январь күндөрү Бишкек шаардык базарында болот.
"Катышам дегендерге эшик ачык. Сүрөтчү, скульптор, прикладдык искусствонун чеберлерин, ЖОЖ студенттерин, мугалимдерин жана окуучуларды сынакка катышууга чакырабыз", — деп айтылат маалыматта.
Атайын комиссиянын ишинин жыйынтыгы менен үч алдыңкы орун аныкталат:
- I орун — 70 миң сом;
- II орун — 40 миң сом;
- III орун — 25 миң сом.
Ошондой эле катышуучуларга жаңы жылдык белектер ыйгарылат. Мындан тышкары, көргөзмөгө күбө болгондор "көрүүчүлөрдүн тандоосу" номинациясы боюнча добуш бере алышат.
Арыз менен эскиздер 2020-жылдын 5-январына чейин кабыл алынат.