Кыргызстан ЮНЕСКОнун материалдык эмес мурастарын сактоо боюнча конвенциясын 2006-жылы ратификациялагандан тарта аталган уюмдун тизмесине кошулган бардык улуттук баалуулуктар түздөн-түз корголот, аларга өзүнчө мыйзам иштеп чыгып, маданий символ катары статус берүүнүн кажети жок. Бул тууралуу Сабира Солтонгелдиева Sputnik Кыргызстан радиосунун таңкы эфиринде маек куруп жатып билдирди.
Анын айтымында, Кыргызстанда "Тарыхый-маданий мурастарды коргоо жана пайдалануу жөнүндө" мыйзам бар. Андагы жоболор кынтыксыз аткарыла турган болсо ар бир маданий мураска өзүнчө мыйзам долбоорун иштеп чыгуунун зарылчылыгы болбойт.
"Ак калпакка маданий символдун статусун берүүнүн кажети жок. Анткени Кыргызстанда "Тарыхый-маданий мурастарды коргоо жана пайдалануу жөнүндө" мыйзамы бар. Андан сырткары, 2006-жылы Кыргызстан ЮНЕСКОнун материалдык эмес мурастарын сактоо боюнча конвенциясын ратификациялаган. Мына ошол мыйзам жана андагы жоболорго ылайык бардык маданий мурастарды коргоп калса болот. Аларга өзүнчө мыйзам долбоорлорун иштеп чыгуунун зарылчылыгы жок. Ар бир адам өзүнөн башташы керек. Бала бакча, мектеп жана жогорку окуу жайлардан тарта улуттук баалуулуктарга аяр мамиле жасап, аздектей турган болсо мыйзамдардын деле кереги жок болот", — деди Солтонгелдиева.
Ал чет өлкөлүк туристтер саякатка чыкканда сөзсүз ЮНЕСКОнун материалдык жана материалдык эмес мурастарынын катарына кирген объектилери бар мамлекеттерге артыкчылык берерин айтып, аталган уюмдун тизмесине кошулган улуттук баалуулуктар аркылуу өлкөнү туризм жаатында өнүктүрсө болорун кошумчалады.