БИШКЕК, 19-дек. — Sputnik. Кримтөбөл Азиз Батукаевдин абактан мыйзамсыз бошотулушу боюнча келерки соттук процесс УКМКнын тергөө абагында өтөт. Бул тууралуу Sputnik Кыргызстан агенттигинин кабарчысына Биринчи май райондук сотунан билдиришти.
Бүгүнкү соттук процесс Алмазбек Атамбаевдин ден соолугуна байланыштуу болбой калды. Көчмө соттук жыйын 24-декабрь күнү саат 10.00дө өтмөй болду.
Ишти УКМКнын тергөө абагынан кароо өтүнүчүн мамлекеттик айыптоочулар берген.
Батукаевдин иши
Азиз Батукаев 2006-жылы баңгизатты мыйзамсыз сактоо, жарылуучу заттарды жана курал-жаракты мыйзамсыз алып жүрүү, массалык башаламандык уюштуруу боюнча айыпталып, 16 жылга эркинен ажыратылган. 2008-жылы абак тартибин бузганы үчүн жаза мөөнөтүнө дагы эки жыл кошулуп, Нарындын №24 абагына которулган. Бирок 2013-жылдын 9-апрелинде оор дартка кабылганына байланыштуу бошотулуп, Кыргызстандын аймагынан Грозныйга учуп кеткен.
2019-жылы апрелде башкы прокурор Өткүрбек Жамшитов ЖК жыйынында криминалдык авторитет Азиз Батукаевдин иши кайра жанданганын билдирген.
Анын бошотулушу боюнча бир катар мурдагы аткаминерлер менен дарыгерлер да суракка чакырылып, кээси камакка алынган. Ал эми мурунку башкы прокурор Аида Салянова, ошол кездеги вице-премьер Шамил Атаханов жана саламаттык сактоо министри Динара Сагынбаева, мурунку башкы прокурор Индира Жолдубаева тергөө менен кызматташмай болду деген жүйө менен үй камагына чыгарылган.