БИШКЕК, 17-дек. — Sputnik. Кыргызстандын хоккей боюнча курама командасы 2022-жылы Кытайда боло турчу Кышкы Олимпиада оюндарына тандоо турунун кийинки этабына өтпөй калды. Бул тууралуу хоккейдин эл аралык федерациясынын сайтында маалымдалат.
Тандоо турунун экинчи айлампасы Румыниянын Брашов шаарында жыйынтыкталды. Кыргызстандын оюнчулары Исландия, Румыния жана Израилдин командаларынан утулуп калган.
Үч оюндун жыйынтыгы менен Кыргызстандын курамасы турнирдик таблицада акыркы орунда калып, Олимпиадага катышуу жолдомосунан куру калды. Тайпада биринчи орунду румыниялык оюнчулар алган.
Кыргызстандын хоккейчилери биринчи квалификациялык раундда ийгилик менен баштаган болчу.