БИШКЕК, 13-дек. — Sputnik. Жогорку соттун Сот департаментинин Ресурстар башкармалыгынын башчысы А.А. аттуу жаран кармалды. Бул тууралуу УКМКнын маалымат кызматы билдирди.
Ага ылайык, А.А. департаменттин кызматкерлери менен алдын ала сүйлөшүп алып, ЖЧК жетекчиси С.Г. аттуу кишиден райондук соттордун биринин административдик имаратын капиталдык ремонт кылуу үчүн жарыяланган тендерди утуу маселесин оңунан чечип берүү үчүн 3 миллион сом пара алган.
Кармалган киши 11-декабрь күнү убактылуу кармоочу жайга киргизилген.
Сот департаментинин сайтындагы маалымат боюнча, Ресурстар башкармалыгынын башчысы Аида Асаналиева болуп саналат.
Азыркы убакта сотко чейинки өндүрүш жүрүп жатат.