БИШКЕК, 12-дек. — Sputnik. 2020-жылдагы ажылык сапарга баруучу талапкерлерди электрондук негизде каттоо ID-карт паспорту аркылуу 2019-жылдын 16-декабрынан 30-декабрь, саат 17:00гө чейин жүргүзүлөт. Бул тууралуу муфтияттан билдиришти.
Маалыматка караганда, алгачкы төлөм 500 доллар төлөнгөнүн тастыктаган квитанциянын негизинде гана кезекке тургузуу жүргүзүлөт.
Электрондук каттоого туруп, ажыга барчуларга коюлган талаптар:
- 2020-жылы ажылыкка каттоо тартиби бир гана электрондук ID-карт (Eid) паспорттун негизинде жүргүзүлөт;
- алдын ала 500 доллар "РСК Банкынын" "Ажылык-2020" эсебине төлөгөндүгү тууралуу квитанциянын түп нускасы;
- ажылыкка катталуу үчүн кайтарымсыз төлөмдүн "РСК Банкынын" "Ажылык-2020" эсебине төлөнгөн 700 сомдун квитанциясынын түп нускасы;
- ажылыкка бара турган адамдын жашаган жери боюнча каттоосу 2019-жылдын 1-августунан кем болбоосу шарт (эски паспорттун мөөнөтү бүтүп алмаштыргандан башкасы);
- электрондук ID паспорт (Eid) менен тышкы паспорт бир баракка көчүрүлүүсү зарыл (тышкы паспорттун жарамдуулук мөөнөтү 2021-жылдын 31-январына чейин бүтсө жараксыз);
- аял киши күйөөсү менен барса нике күбөлүгү, ал эми тууганы менен барса туулгандыгы тууралуу күбөлүк дагы талап кылынат. Эгер 1975-жылдын май айында төрөлсө метирке же нике күбөлүгүнүн көчүрмөсү талап кылынат, ал эми июнь айында төрөлсө документтин түп нускасы талап кылынат;
- 3х4 көлөмүндөгү 4 даана сүрөт. Сүрөт түстүү, ак фондо, жалтырабаган кагазда болуусу шарт. Аялдар үчүн сүрөткө ак жана кара жоолук, ал эми эркектер ак көйнөк жана ак баш кийим менен түшкөнгө болбойт. Фотошоп менен оңдолуп-түзөлгөн сүрөттөр жараксыз деп таанылат;
- №086у формасындагы медициналык справка;
- персоналдык маалыматтарды иштеп чыгууга макулдугун берген катка кол коюу (ID-карт паспортунда көрсөтүлгөн колу гана жарактуу);
- келишимге кол коюу жана Ажылык серверге киргизүү;
- ажылык визасын алуу үчүн анкетага кол коюу (тышкы паспортунда көрсөтүлгөн колу гана жарактуу);
- ажыга баруучунун кийим размери жана жеке телефон номери, каттап жаткан операторго берүүсү талап кылынат;
- ажылыкка баруучу жарандын жашы 18 жаштан төмөн болбоосу шарт (2020-жылы 18 жашка толо турган жарандар ажыга барууга укуктуу);
- Сауд Араб Падышалыгы тарабынан же САПтын ажылык базасынан (масар электрония), виза алуу учурунда, мурда ажыга барган талапкерлерге калькуляциядан тышкары кошумча төлөмдөр пайда болсо, ажыга баруучу өзү төлөйт.