БИШКЕК, 6-дек. – Sputnik. Ноокенде "колундагы куралын адамдар турган жакка каратып ок чыгарды" деген киши кармалды. Бул тууралуу Жалал-Абад облустук ИИББден билдиришти.
Ноокенде адамдарды көздөй ок аткан киши кармалды
© Фото / пресс-служба УВД Джалал-Абадской области
Маалыматка караганда, окуя 5-декабрь күнү саат 17.00дөр чамасында Тоскоол-Ата токой чарбасына караштуу "Кыргызнефтегаз" ААКнын газ бөлүштүрүүчү станциясынын жанында болгон.
"Майлуу-Суу шаарынын 50 жаштагы Ш.Б. аттуу тургуну кочкораталык А.А. менен Е.П. деген кишилер турган тарапты көздөй ок чыгарган. Факты боюнча Кылмыш-жаза кодексинин "Ээнбаштык" беренеси боюнча сотко чейинки өндүрүш иши ачылган", — дешти милициядан.
Ыкчам иликтөө иш-чараларынын жүрүшүндө шектүүнүн өздүгү жана жүргөн жери аныкталып, ок атуучу куралы далил буюм катары алынган.
Учурда шектүү камакка алынып, тергөө амалдары жүрүүдө.