Жашым 25те. 2013-жылы Ак-Ордо-3 конушунан жер алып, курулушту 2017-жылы баштадык. Биз үйдү бүтүргөнчө эле жарык киргизип берем, суу алып келебиз деп акча сурагандар көп болду. Бул тууралуу Сыргак Майрамбек уулу Sputnik Кыргызстан радиосунун эфиринде маек куруп жатып билдирди.
Анын айтымында, жаңы конуштун жашоочуларынан ар кандай социалдык маселелерин чечип берүүгө каражат чогултуп, из суутуп кеткендер көп кездешет.
"Ак-Ордо-3 конушундагы көйгөйлөргө өзүм жер тилкесин алып, курулуш баштаган соң туш болдум. Ар кандай социалдык маселелерди чечип берүүнү убадалап, элден акча чогултуп изин таптырбай кеткендер көп болот экен. Эл да мындан тажап бүтүптүр. Минтип жашоого мүмкүн болбостугун түшүнгөн соң демилгени колго алып иштей баштадым. Алгач мага деле ишенгендер аз болду. Командамдын жардамы менен акырындап ийгиликтерге жетишип жатабыз десек болот. Мага караштуу 520-контурда жашаган 1200 түтүн 15 000 сомдон чогултуп беришти. Жалпы 23 көчөбүз болсо, анын 16сына түтүк киргизилип таза суу алып келинди. 6-7 прожектер коюлду, электр энергиясын тарттырып келдик. Жолдорго шагыл төгүлдү. Өзүбүз түзүп алган протоколдун негизиндеги иштердин 60 пайызы бүтүп калды. Мага мындай иштерди аткарып жатканыма маяна деле берилбейт. "Айлык албай айыл башчы болуп эмне кереги бар сага" дегендер да жок эмес. Бирок мен кийин балдарыма бардык шарты бар ата конушун таштап кетким келет", — деди Майрамбек уулу.
Ал социалдык маселелерден сырткары, конуштагы бөбөктөр үчүн да түрдүү маданий иш-чараларды уюштуруп турарын кошумчалады.