БИШКЕК, 3-дек. — Sputnik. Кийинки жылы чек арага чектеш аймактарды өнүктүрүүгө 100 миллион сом бөлүнөт. Бул туурасында 2020-жылга карата кабыл алынган бюджеттин мыйзам долбоорунда жазылган.
Жогорку Кеңештин Бюджет жана финансы комитетинин төрагасы Эмил Токтошев аталган программа Ош, Жалал-Абад, Баткен облустарында Өзбекстан менен Тажикстандын чегинде жашагандарга тиешелүү экенин айтты.
Ага ылайык, каражат социалдык объектилерди курууга, айыл өкмөттөрдүн ишин жакшыртууга жана жумуш орундарын түзүүгө бөлүнөт. Мындан сырткары, айылдардын ичинде жасалган иш-чараларга колдоо көрсөтүп, жергиликтүү долбоорлордун ишке ашырылышын шарттайт.
Токтошевдин айтымында, программанын максаты — чек арага жакын жашаган тургундардын жашоо-шартын жакшыртып, айылда калышына шарт түзүп берүү.
Ал эми 2019-жылы чек арага чектешкен аймактарды өнүктүрүүгө 50,6 миллион сом бөлүнгөн.