БИШКЕК, 29-ноя. — Sputnik. Америкалык ырчы Мадонна ден соолугунан улам Madame X гастролдук программасынын алкагында үч концертин токтотууга аргасыз болду. Бул тууралуу ал Instagram баракчасына жазды.
61 жаштагы ырчы турнесинин алкагында 30-ноябрдан 2-декабрга чейин Бостондо үч концерт бериши керек болчу.
Ал мындай кадамга дарыгерлердин корутундусунан кийин барган.
"Күтүүсүздөн болгон мындай окуя үчүн кечирим сурайм. Силердин алдыңарда ырдоо мен үчүн ырахат. Аларды токтотуу мага болгон жаза. Бирок азыр менин оорум жан чыдагыс болууда. Мен бир аз эс алып, кийинки концерттерди улантуу үчүн дарыгерлердин айткандарын кылышым керек", — деди ал.
Мадонна жанын кыйнап жаткан дарт тууралуу так жазган эмес. Буга чейин ал Сан-Францискодогу концерт маалында тамагы менен тизеси ооруп жатканын айткан болчу.
Ырчынын расмий сайтында Бостондо болбой калган концерт башка датага жылдырылбай турганы маалымдалды. Буга чейин сатылган билеттердин акчасы кайтарылмакчы.