БИШКЕК, 26-ноя. — Sputnik. Айэркен Саймаити жана аны менен иштешкен адамдар Кыргызстандан 932 миллион 736 миң доллар чыгарып кеткен. Бул туурасында Экономикалык кылмыштарга каршы күрөшүү кызматынын (Финпол) төрагасы Бакир Таиров билдирди.
Эске салсак, буга чейин "Азаттык" радиосу менен Kloop басылмасы өлкөдөн 700 миллион доллар чыгарылып кеткени тууралуу иликтөөсүн жарыялаган.
Таиров азыркы тапта журналисттик иликтөө боюнча сотко чейинки өндүрүш иши жүрүп жатканын белгилеп, бир нече фактыларды айтты.
"Айэркен Саймаити, Буфилли Бумайрам жана "Абдыраз" ишканасынын (Саймаитиге таандык — ред.) акча жөнөтүүсү боюнча банктык документтердин баары алынды. Алардын эсептеги негизги каржы булагы накталай акча болгон. Саймаити, Бумайрам жана башка сегиз адамдын 17 банк аркылуу 932 миллион 736 миң доллар чет өлкөгө которгону аныкталды", — деди Таиров.
"Банктардын расмий жообу боюнча акча курулуш, текстиль материалдары, электрондук товар үчүн жана карызды кайтаруу, жер тилкеси, турак жай сатып алуу максатында которулган. Салыктык текшерүүнүн негизинде, Саймаитинин кирешелер жөнүндө декларация тапшырбай 2 миллиард 602 миллион сом салык төлөбөгөнү аныкталды", — деди Таиров.
Бул факты кирешени жашыруу фактысы боюнча Кылмыштардын жана жоруктардын бирдиктүү реестрине катталган.