БИШКЕК, 20-ноя. — Sputnik. Борбор калаадагы Көк-Жар конушунда аялды уурдап кетип, уруп-согуп, үйүндө үч күн камап жаткан деп шектелген киши эки айга убактылуу кармоо жайына киргизилди. Бул тууралуу Октябрь райондук милициясынан кабарлашты.
Быйылкы жылдын 9-ноябрында Бишкек шаардык травматология жана ортопедия илим-изилдөө борборуна баш сөөгү талкаланган, мээси чайкалган жана көкүрөгүнөн жаракат алган аялдын түшкөнү боюнча милицияга кабар келген.
Ооруканага Октябрь райондук милициясынын 3-бөлүмүнүн кызматкерлери барганда, жабырланган аял арыз жазган.
"Ж.Н. аттуу аял Көк-Жар конушунда Эсен аттуу киши үч күн үйүндө анын эркинен тышкары күч менен кармап жатканын жана улам уруп-сабап тургандыгын билдирген", — деп айтылган маалыматта.
Аталган бөлүмдүн кызматкерлери бул ишке шектүү катары 47 жаштагы кишини кармап, Октябрь райондук тергөө кызматына алып келишкен. Жазык процессуалдык кодексинин 98-беренесинин негизинде аны Октябрь райондук соту Бишкек шаарындагы убактылуу кармоо жайына эки айга камоо боюнча баш коргоо чарасын тандаган.