БИШКЕК, 18-ноя. — Sputnik. Казакстандын борбору Нур-Султан шаарынын бир бөлүгү жекшемби күнү, 17-ноябрда, авариядан улам суусу жок калган. Бул тууралуу Sputnik Казакстан агенттиги жазды.
Ага ылайык, таңкы саат 5:40тар чамасында суу берүүчү түтүк жарылып, 20дан ашык көп кабаттуу үй суусуз калган. Суу менен камсыздаган "Астана Су Арнасы" ишканасы тургундарга водовоз менен суу жеткирген.
Бирок шаар тургундары тийиштүү ишкана эч кандай суу алып келбей жатканын социалдык тармакка жазышкан.
Эске салсак, 10-ноябрда түнкү саат экиде "Левобережная" көмөк чордонунда кабель күйүп кеткен. Анын кесепетинен жети турак жай комплекси менен 25 административдик имарат жарыксыз калган.
Электр энергиясы мамлекеттик маанилүү объектилерде дагы өчкөн. Алардын ичинде Акорда, өкмөттүн имараты, Жогорку сот, сенат, мажилис, министрлер үйү да бар.