БИШКЕК, 18-ноя. — Sputnik. Кыргызстандык ишкерлерге таандык Air Manas компаниясы түркиялык Pegasus Airlines менен ишин токтотту. Маалыматты Транспорт жана жолдор министрлиги тастыктады.
"Air Manas мындан ары Улуу Британиянын Белфаст шаарында каттоодон өткөн AviaTrade Corp. LP. компаниясы менен кызматташат. Жарандык авиация агенттигинин директору Курманбек Акышев бардык документтик иштер аяктаганын кабарлады", — деп айтылат билдирүүдө.
Маалыматка караганда, компания мурдагы жалгыз учагынын үстүнө жаңы өнөктөштөрү менен эки учак сатып алды.
Эске салсак, Air Manas компаниясынын каттамдары бир нече убакыттан бери үзгүлтүккө учурап жүрүп, өткөн айдын аягынан бери учпай калган. Эми жаңы өнөктөш менен каттамдар 25-ноябрдан тарта жаңыланганы турат.
AviaTrade Corp. LP. компаниясы Улуу Британиядан каттоодон өткөнү менен россиялык ишкерлерге тиешелүү экени айтылат.
Мындан башка Кыргызстанда жеке ишкерлерге тиешелүү дагы эки компания бар — Avia Traffic жана TEZ JET. Биринчиси өлкөнүн ичине да, сыртка дагы каттайт. Экинчиси Кыргызстандан чыкпайт. Экөө тең кыргызстандык авиаторлор Карим Дамин менен Алик Аскаровго таандык экени айтылат. Юстиция министрлигиндеги документтерде негиздөөчүлөрдүн катарында бул экөөнөн башка Аскаров Максим Аликович менен Мамытов Эсен Сыргакович деген ысымдар бар.
Мамлекетке таандык "Эйр Кыргызстан" ишканасынын жалгыз учагы бузулуп, 2017-жылдын ноябрь айында ишин токтоткон.