"Кыргызалтын" ААКсынын болжолдуу эсептөөсү боюнча, "Макмал" алтын комбинатын дагы 10-12 жыл иштетсе болот. Бул тууралуу Азамат Назарбаев Sputnik Кыргызстан радиосунун "Ачык кеп" программасында маек куруп жатып билдирди.
Анын айтымында, келишимге ылайык компания "Макмал" алтын комбинатынан жыл сайын түшкөн жалпы кирешенин эки пайызын Тогуз-Торо районун өнүктүрүү фондусуна бөлүп турат.
"Буга чейин чыгашага учурап, бир жылга дейре токтоп турган "Макмал" алтын комбинатынын ишке киргени өлкө экономикасы үчүн чоң пайда алып келет. Келишимге ылайык, комбинаттан жыл сайын түшкөн жалпы кирешенин эки пайызы Тогуз-Торо районун өнүктүрүү фондусуна которулуп турат. Андан сырткары, компанияда иштеген жумушчулардын 90 пайызы жергиликтүү калктан болот. Ошондой эле социалдык пакеттин алкагында эт иштетүүчү комбинат жана цемент чыгаруучу завод куруу демилгелери бар. Мындан сырткары, келишим боюнча чалгындоо иштери аяктаганга чейин жергиликтүү өнүктүрүү фондуна жыл сайын 10 миллион сомдон бөлүнүп, жумушчулардын 70 пайызы Тогуз-Торо районунун тургундарынан алынат. Бул — келечеги кең долбоорлордун бири. Баары ойдогудай ишке аша турган болсо, "Макмал" алтын комбинаты дагы 10-12 жыл иштеп берет деген үмүт бар", — деди Назарбаев.
Ошондой эле ал "Макмал Голд Компани" ЖЧКсында "Кыргызалтын" ААКсынын үлүшү 34 пайыз экенин кошумчалады.