БИШКЕК, 16-ноя. — Sputnik. Бүгүн, 16-ноябрда, Бишкекте панфиловчу аскерлердин жаркын элесине арналган митинг-реквием өттү.
316-аткычтар дивизиясынын эрдигинин 78-жылдыгына арналган акция борбор калаадагы Иван Панфилов атындагы паркта болуп, 250дөн ашуун адам чогулду. Эскерүүгө Жогорку Кеңештин депутаттары, Бишкек мэриясынын, Россиянын Кыргызстандагы элчилигинин, "Россотрудничество" коомдук уюмунун өкүлдөрү, аскер-патриоттук клубдун жетекчилиги жана жарандык активисттер катышты. Мындан сырткары, студенттер менен окуучулар да келишти. Иш-чараны "Европалыктар — жаңы толкун" фонду уюштурган.
ЖК депутаты Исхак Масалиев ар улуттун аскерлеринен түзүлгөн панфиловчулар дивизиясы баа жеткис эрдик көрсөткөнүн билдирди.
"Ушундай адамдардын эрдигинин арты менен тынччылык өкүм сүрүүдө. Бактыга жараша биз андай кыйынчылыкты, согушту көргөн жокпуз, андай күн башка келбесин. Бирок биздин ата-бабаларыбыз согушуп жүрүп өттү. Азыр ушул тарыхты өчүрүп салууну каалап жаткандар же келесоо, же душман дээр элем", — деди Масалиев.
"Биз бүгүн кан-жанын аябай Ата Мекенди коргогон аскерлерди эскерип жатабыз. Өзүңүздөрдүн баатырларыңыздарды унутпаңыздар", — деди Сургаев.
"Россотрудничество" коомдук уюмунун Кыргызстандагы өкүлчүлүгүнүн жетекчиси Виктор Нефедев эскерүү акциясына көп сандагы жаштардын келиши кубанычтуу көрүнүш экенин билдирди.
"Кыргызстандын жаштары өз баатырларын эстеп жатканы кубанаарлык нерсе. Улуу Ата мекендик согуш жөнүндөгү тарыхый маалыматтарды сактап келе жатканы үчүн өлкө башчысына өзүнчө ыраазычылык билдирем. Бул жылы бир гана Россия менен Кыргызстандын президенти 9-майда "Өлбөс полктун" жүрүшүнө катышты", — деди Нефедев.
Иш-чара унчукпай эскерүү жана Советтер Союзунун баатыры Иван Панфиловдун эстелигине гүл коюу менен жыйынтыкталды.