БИШКЕК, 14-ноя. — Sputnik. Москвада дайынсыз жоголуп кеткен кыргызстандык мигрант табылды. Бул тууралуу ИИМден билдиришти.
Кыргызстандын ИИМинин Россиядагы өкүлчүлүгүнө 33 жаштагы кыргызстандык келин кайрылган. Ал 2004-жылдан бери Россияда иштеп жүргөн 30 жаштагы жолдошу жоголуп кеткенин айткан. 2019-жылдын октябрь айында ал жумушуна унаасы менен кетип, ошону менен кайтып келген эмес.
Киши Москвадагы айлампа жолдон табылып, шаардагы ооруканалардын биринин реанимация бөлүмүнө түшкөнү белгилүү болду.
Дарыгерлер бейтаптын баш сөөгү катуу жабыркаганын аныкташкан. Учурда тийиштүү экспертиза дайындалып, бейтап эмнеден улам жаракат алганы такталып жатат.