БИШКЕК, 14-ноя. — Sputnik. Жалал-Абаддын Криминалдык милиция кызматы ишкерди уурдап, андан соң акча талап кылган кишини — кылмыштуу топтун мүчөсүн кармады. Бул туурасында аталган ведомствонун маалымат кызматынан кабарлашты.
Жалал-Абад: ишкерди уурдап, 20 миң доллар талап кылган киши кармалды. Сүрөт
© Фото / пресс-служба УВД Джалал-Абадской области
"2019-жылдын 11-февралында Жалал-Абад шаарындагы кафеден белгисиз бирөөлөр күч менен Т.Ф. аттуу ишкерди Honda Fit автоунаасына салып, Бишкекке алып кетишкен. Андан кийин туугандарынан 20 миң доллар талап кылышкан", — деп айтылат маалыматта.
Бул факты Жазык кодексинин 170-беренесинин негизинде (Адам уурдоо) Кылмыштар менен жоруктардын бирдиктүү реестрине катталган.
Тартип коргоо органдарынын кызматкерлери шектүү эки кишини кармап, барымтада жаткан ишкерди бошоткон. Дагы экөө изделүүдө.
Ноябрдын башында милиция изделип жаткандардын биринин кайда экендигин тастыктап, ал кылмыштуу топтун өкүлү катары атайын каттоодо турганы аныкталган.
26 жаштагы М.Ш. аттуу жарандын Бишкекте жашырынып жүргөнү жана кармалгандан кийин облустагы убактылуу кармоо жайына киргизилгени айтылды. Учурда анын башка кылмыштарга тиешеси бар-жогу такталууда.