БИШКЕК, 13-ноя. — Sputnik. Жаңы жылдан тарта Германиянын Кыргызстандагы элчилиги Испания, Италия жана Австрияга виза берүү ишин токтотот.
"Элчилик 2020-жылдын 1-январынан тарта Испания, Италия жана Австрия мамлекеттерине виза берүү боюнча арыздарды кабыл албайт. Бул жобо бардык сапарларга жана паспорттордун бардык түрлөрүнө (дипломатиялык жана кызматтык паспортторду кошкондо) тиешелүү", — деп айтылат маалыматта.
Ал эми 2019-жылдын 31-декабрына чейин берген арыздар учурда каралып, иштелип жаткандыгы белгилүү болду.
Аталган мамлекеттерге виза алуу үчүн 2020-жылдын 1-январынан тарта төмөнкү даректерге кайрылууга болот:
- Испанияга сапар алгандар Нур-Султан шаарындагы Испаниянын Казакстандагы элчилиги. Аталган өлкөдөгү дагы бир кеңсе — Алматы калаасындагы BLS виза борбору (кенен маалыматтарды бул жерден алса болот).
- Италияга сапар алгандар Нур-Султан шаарындагы Италиянын элчилиги, ал жердеги виза бөлүмү (кенен маалыматтарды бул жерден алса болот).
- Австрияга сапар алгандар Нур-Султан шаарындагы Австриянын элчилиги, ал жердеги виза бөлүмү (кенен маалыматтарды бул жерден алса болот).
Элчиликтин виза боюнча өкүлчүлүгү Шенген келишиминдеги төмөнкү мамлекеттерге арыздарды кабыл алат. Алар — Бельгия, Греция, Люксембург, Нидерланд, Норвегия, Португалия жана Швеция.