БИШКЕК, 7-ноя. — Sputnik. Футбол оюнун көрүүгө келген UFC уюмунун жеңил салмактагы чемпиону Хабиб Нурмагомедовду трибунадагы эл нааразы болуп тосуп алды.
Россиялык спортчу Москва шаарында өткөн "Ювентус" менен "Локомотив" командаларынын беттешине күбө болгон. Хабибдин "Ювентустун" оюнчусу Роналду менен эски дос экени маалым.
Мушкердин матчка келгени тууралуу жарыяны фанаттар ышкырык менен коштоп тосуп алышканын "Спорт-Экспресс" жазды.
Беттештен кийин Нурмагомедов "Локомотивдин" оюнун баалап, Криштиану Роналдунун көрсөткөн футболуна ичи чыкпаганын билдирген.
"Мыкты оюн болду, мага жакты. Роналду үч мүмкүнчүлүктү колдон чыгарып жиберди... Ырас эле ошентиптир. "Локомотивдин" оюну таң калтырды", — деген атактуу мушкердин сөзүн sport24.ru келтирди.
Хабиб москвалык клубдун деңгээли ушундай жогору экенин буга чейин ойлобогонун да жашырган эмес.