БИШКЕК, 4-ноя. — Sputnik. Сокулукта кулчулукта жүргөн аялдардын биринин тууганы пара талап кылган деп шектелүүдө. Бул тууралуу Чүй облустук милициясынын маалымат кызматы билдирди.
19-сентябрда шектүү Сокулук РИИБине кайрылып, Гүлмира аттуу аял анын тууганын жана эки аялды кулчулукта кармап жүргөнүн айткан. Кабарланган дарек боюнча келген укук коргоо органдарынын өкүлдөрү үч аялды тапкан, алардын бирөө чынжырга байланып турган. Аталган факты Кылмыштар менен жоруктардын бирдиктүү реестрине катталып, Кылмыш-жаза кодексинин 172-беренеси («Эркиндигинен мыйзамсыз ажыратуу») боюнча сотко чейинки тергөө амалдары башталды.
"Тергөө учурунда үч аялды кулчулукта кармады деген үй ээси аялдардын биринин тууганы 8 миң доллар берсең милицияга жазган арызымды алам дегенин айтып, УКМКга кайрылган. Бирок үй ээси акчаны берүүдөн баш тартканда көзүңдү тазалайм деп коркутуп, ЖМКга кайрыларын билдирген", — деп айтылат маалыматта.
Бул факты Кылмыштар менен жоруктардын бирдиктүү реестрине катталып, Кылмыш-жаза кодексинин 203-беренеси ("Опузалап акча талап кылуу") боюнча сотко чейинки тергөө амалдары башталган.
Пара талап кылды деген киши 100 миң сом алып жаткан жеринен кармалып, Сокулук райондук сотунун чечими менен камакка алынды.
Чүй облустук милициясы аталган фактылар боюнча тергөө амалдары уланып жатканын билдирди.