БИШКЕК, 2-ноя. — Sputnik. Окумуштуулардын эл аралык тобу адамдын табияттан тыш күчтөргө, анын ичинде шайтанга ишенүүсү инфекциялык оорулардын тарашына байланыштуу экенин аныктаганын "Известия" жазды.
Кара тумоонун (чума — ред.) жана ушул сыяктуу жугуштуу оорулардын жайылып кетиши адамды моралдык витализмге түртөт. Тагыраагы, ал ден соолугунун начарлашын жаман жана жакшы күчтөрдөн көз каранды деп ойлой баштайт. Окумуштуулардын айтымында, адамдын мындай жүрүм-туруму чындыгында эле илдетке кабылуу коркунучун азайтып, иммундук системаны бекемдей алышы ыктымал.
Теориялык фольклористика илим-изилдөө лабораториясынын кызматкери Ольга Христофорова азыркы замандын кишиси эмне себептен шайтандардан коркорун түшүндүрүп берген. Анын айтымында, киши өзүнүн денесинде жана психикасында эмне болуп жатканын түшүнбөгөндө, ал ичине "каардуу күч" кирип алып, азапка салып жатканына ишендиргиси келет.
Адистер кандай гана оору болбосун, дарыгерге кайрылуу керек экендигин баса белгилеген.