БИШКЕК, 1-ноя. — Sputnik. Алдыдагы 30 жылда климат өзгөрүп, суунун деңгээли көтөрүлө тургандыктан жүз миллиондогон киши турак жайын таштап кетүүгө аргасыз болот. Бул тууралуу Nature басылмасы жазды.
Окумуштуулардын изилдөөсү боюнча, 2050-жылга карата 300 миллион киши жашаган аймактар суу алдында калат. Ал эми 2100-жылы учурда 200 миллион киши жашаган жер таптакыр жашоого ыңгайсыз абалга келет.
Эсептөөлөр боюнча эң көп зыянды Кытай, Япония, Индия, Вьетнам, Таиланд, Бангладеш, Индонезия жана Филиппиндер тартат. Аталган өлкөлөрдүн жээктери суу алдында калат. Учурда бул аймактарда 150 миллион киши жашайт, алардын 70 пайызы үй-жайын таштап кетүүгө аргасыз болот.
Аралча мамлекеттер толугу менен суу алдында калышы ыктымал. Мисалы, Мальдив аралдарынын жарымынан көбү 80 жылдын ичинде жок болушу мүмкүн экени айтылды.