БИШКЕК, 29-окт. — Sputnik. БУУнун баңгизат жана кылмыштуулук боюнча Кыргызстандагы башкармалыгы Жаза аткаруу мамлекеттик кызматына жаңы Land Cruiser жолтандабасын белекке берди. Бул тууралуу ведомстводон билдиришти.
Автоунаа шейшемби күнү "КРдин кылмыш-жаза системасы боюнча камактагы адамдар арасында экстремисттик идеялардын жайылышын алдын алууну ишке ашыруу" долбоорунун алкагында тапшырылды. Иш-чарага ЖАМКтын төрагасы Мелис Турганбаев, анын орун басары Аскат Эгембердиев, БУУнун баңгизат жана кылмыштуулук боюнча башкармалыктын жетекчиси Андрей Селезнев менен ЖАМКтын борбордук аппаратынын жеке курамы катышты.
Ал эми Турганбаев БУУнун аталган башкармалыгы менен ЖАМК тыгыз мамиледе иштерин белгилеп өттү. Анын айтымында, кызматташкан жылдар аралыгында коопсуздукту күчөтүүдө жана абактагылардын ден соолугуна кам көрүүдө кыйла жетишкендиктер болгон.