БИШКЕК, 29-окт. — Sputnik. Бишкекте аралаш мушташ боюнча WEF Gran Prix 2 турнири өтүп, байгеге коюлган Toyota Camry 5 унаасын Рыскулбек Ибраимов утуп алды. Бул тууралуу турнирди өткөргөн Кулатуу эр таймаш федерациясынан кабарлашты.
Мелдеште Кыргызстандын 57 килограмм салмактагы алдыңкы мушкерлери олимпиадалык тартип менен күч сынашкан. Тагыраагы, 1/8 беттештен баштап финалга чейин жеткен мушкер жеңүүчү аталды. Жалпысынан 16 мушкер ат салышты.
Натыйжада финалда Рыскулбек Ибраимов менен Арген Муратбек уулу беттешип, калыстардын чечими менен Ибраимов жеңүүчү аталган.
Сыйлык катары спортчуга Toyota Camry 5 үлгүсүндөгү унаа ыйгарылды. Автокөлүктүн ачкычын Жогорку Кеңештин төрагасы Дастан Жумабеков тапшырган. Ал эми Арген Муратбек уулуна 40 миң сом сый акы берилген.