БИШКЕК, 16-окт. — Sputnik. Американын ABC телеканалынын көрүүчүлөрү Сирияда аскерий чабуулдар жүрүп жатканы боюнча эфирден көрсөтүлгөн кадрлардын жалган экенин аныктап чыкты.
Аталган видеорепортаж социалдык тармактарга тарап, кызуу талкууга жем таштаган.
Телеканал кечки берүүсүндө түрк аскерлеринин Сирияга чабуул коюп жатканын баяндап, АКШда болгон аскерий машыгуунун видеолорун көрсөткөн. Материалда "түрк армиясынын чабуулу таасын көрүнүп турган видео окуя болуп жаткан жерден алынган акыркы кадрлар" деп белгиленген. Бирок ал кадрлар чынында 2017-жылы АКШнын Кентукки штатындагы машыгуу учурунда тартылганы белгилүү болду.
Кийинчерээк ABC телеканалынын жетекчилиги видео фейк экенин моюндап, ката кетиргени үчүн өкүнүп турганын айткан. Бирок соцтармактын колдонуучулары телеканал өз аудиториясынын ишенимин жоготконун жазышууда.