БИШКЕК, 14-окт. — Sputnik. АКШнын Тампа шаарында өткөн UFC Fight Night 161 турниринде Нико Прайс менен Джеймс Виктин кармашы кеченин бүйүр кызыткан беттеши деп табылды.
Бул күнү негизги беттешке Йоанна Енджейчик менен Мишель Уотерсон чыккан. Бирок америкалыктардын мушташы андан да кызыктуураак болгону айтылат. Кармаштын видеосун FOX Sports телеканалы жарыялады.
Беттеш биринчи раундда эле укмуштуудай нокаут менен аяктаган. Прайс дароо эле чабуулга өтүп, каршылашын бутка уруп, партерде катуу иштей баштаганын көрүүгө болот. Ал эми Вик каршы турууга аракет кылып атаандашынын үстүнө чыкканда байкабай катуу сокку жеп калды. Жерде жаткан Прайс тепкенде сокку ээгине тийип, сулап түшкөн.
Мындай беттеш үчүн Нико Прайс турнирдин уюштуруучулары тарабынан өзүнүн гонорарынан сырткары 50 миң доллар акчалай сыйлык алды.