БИШКЕК, 12-окт. - Sputnik. Казакстандын биринчи президенти өлкөгө өзгөрүүлөр жана жаңы адамдар керек болуп жаткандыгын сезип, кызматын тапшырган. Бул тууралуу Нурсултан Назарбаевдин “Хабар” телеканалына берген маегине таянып Sputnik Казакстан жазды.
Өлкөнү дээрлик 30 жыл башкарган Назарбаев 20-мартта кызматын өткөрүп берген. Ордуна парламент сенатынын төрагасы Касым-Жомарт Токаев келген.
"Элдин кайсы бир бөлүгү, балким, бир эле адамдын башкаруусунан тажады болушу керек. Экинчиден, эч нерсе ордунда турбайт. Жаңылануу, жаңы жүздөр керек болчу. Анткени ар бир жаңы кадр өзүнүн салымын кошот. Мен бардыгын терең ойлонуп туруп кылгам. Ордума таштап кеткен адам үчүн өкүнбөйм”, — деди Назарбаев.
“Өлкөнүн жетекчиси дайыма ат үстүндө, эл алдында болушу керек. Анын энергетикасы күчтүү болушу шарт. Эгер мен ата-энемден ошондой энергетиканы ала албай калган күндө башымдан өткөн тоскоолдуктарды жеңе албасам керек”, — деди экс-президент.
Ага катар казак эли өз тарыхында болуп көрбөгөндөй жакшы турмушту башынан кечирип жатканын айтты.
“Казак эли азыркыдай жашап көрө элек болчу. Ким миллиондукка айланган биздикиндей борбор калааны курду?” — деген суроо узатты Назарбаев.
Мындан тышкары, ал “өлкөдө кош бийлик жүргүзүлүп жатат” деген кептерди төгүндөдү. Мурдагы президенттин пикиринде, бул жөн гана өлкөдөгү стабилдүүлүктү бузгусу келген жактардын бузукулугу.