БИШКЕК, 7-окт. — Sputnik. Интернетке көшөгөдө жулкунуп, чыгып кетүүгө аракет кылып, ыйлап жаткан кыздын видеосу тарады.
Ал "Короче" деп аталган Телеграмм-каналга жайгаштырылган.
Видеодон бөлмөнүн ичинде тагылып турган көшөгөнү, анын ичинде чырылдап ыйлап, каршылык көрсөтүп, эшикти көздөй жулунган кызды көрүүгө болот. Ал эми жанындагы аял кишилер кармап калууга жана башына жоолук салууга аракет кылып жатат. Видеонун алдына бул окуя Талас аймагында болгондугу жазылган.
Ал эми Талас облусунун милициясынан бул видеону териштирип, кайдан тартылгандыгын тактап жаткандыктарын билдиришти.
"Факты боюнча текшерүү жүрүп жатат. Эгерде бул Таласта болсо, буга чейин ызы-чуу чыгып кетмек. Муну аталган аймакта болгон дей албайбыз", — дешти алар.
Талас облустук милициясынан тартип сакчылары текшерип, окуянын чоо-жайын аныктамайын алдын ала жыйынтык чыгарбоону суранышты.