БИШКЕК, 6-окт. — Sputnik. Кыргызгидрометтин божомолу боюнча келерки жумада өлкөнүн көпчүлүк аймагында жаан-чачын жаайт.
6-7-октябрда түнкүсүн тоолуу райондордо кар жаашы күтүлөт, дыйканчылык аймактарда жаан-чачын болбойт.
9-октябрда түнкүсүн Чүй, Жалал-Абад, Ысык-Көл, Нарын облустарынын көпчүлүк аймактарында, Ош, Талас, Баткен облустарынын кээ бир райондорунда жаан жаап, тоолуу райондордо кар жаашы мүмкүн. Күндүз Ысык-Көл, Нарын облустарынын көпчүлүк аймактарында, Чүй, Жалал-Абад облустарынын тоо этектеринде жаан, тоолуу райондордо кар жаашы күтүлөт. Ош облусунун тоолуу райондорунда кар түшүп, дыйканчылык аймактарында күн ачык болот.
10-октябрда түнкүсүн Ысык-Көл облусунун кээ бир райондорунда жаан жаайт. Калган облустарда жаан-чачын күтүлбөйт.
Батыштан соккон шамалдын ылдамдыгы секундасына 4-9 метрден, 9-октябрда Ысык-Көл, Нарын облустарынын айрым жерлеринде 15-20 метрге жетиши мүмкүн.