БИШКЕК, 4-окт. — Sputnik. Кыргызстанда октябрь айынын биринчи дем алышында билим берүү тармагынын кызматкерлеринин кесиптик майрамы белгиленет. Муну утурлай Улуттук статистика комитети мугалимдер тууралуу кызыктуу фактыларды жарыялады.
— Ушул тапта Кыргызстанда 4000ден ашуун мектепке чейинки, жалпы, баштапкы, орто жана жогорку кесиптик билим берүү мекемелери иштейт. Аларда 1,7 миллионго жакын адам билим алат;
— Бул билим берүү жайларында 108 миңге жакын педагог эмгектенет. Алардын арасынан олуттуу бөлүгүн мектеп мугалимдери түзөт;
— Кыргызстанда мугалимдик кесипти салттуу түрдө аялдар көп аркалайт. Мисалы, мектептердеги окутуучулардын 85 пайызын аялдар түзөт.
— Мектептерде иштеген алардын 30 пайызга жакыны жетекчилик кызматтарды аркалайт;
— 2018-2019-окуу жылынын башына карата мугалимдердин 87 пайыздан ашууну жогорку билимге ээ экени аныкталган;
— Шаардык мектептерде бир мугалимге орточо эсеп менен 20 окуучу туура келсе, айылдык мектептерде 15 окуучу туура келет.
— 2018-2019-окуу жылында республикадагы бардык жогорку билим берүү жайларында 5 миңден ашык педагог бүтүп чыккан.
Биздин Telegram-каналга жазылыңыз.