БИШКЕК, 3-окт. — Sputnik. Жаштар иши, дене тарбия жана спорт агенттигинин жетекчиси Канат Аманкулов башкы жана улук машыктыруучулар менен Олимпиада оюдарына даярдык тууралуу жыйын курду. Бул тууралуу аталган агенттиктин маалымат кызматынан билдиришти.
Жолугушууда Спорт агенттигинин жетекчиси Канат Аманкулов машыктыруучулардан кайсы спортчулардын Олимпиадага лицензия алууга мүмкүнчүлүгү бар экендигин сураган.
"Биз Токио Олимпиадасына чоң максаттарды коюп жатабыз. Сиздер ишеничти актаганга аракет кылышыңыздар керек. Башында мындай ири оюнга катышуунун өзү жетишкендик дечүбүз. Эми андай убактан өттүк. 2019-2020-жылдары мүмкүн болушунча көбүрөөк лицензия алганга күч жумшайлы", — деди Аманкулов.
Өз кезегинде Олимпиадалык спорт боюнча дирекциянын жетекчиси Жоомарт Шамканов спортчуларды эл аралык мелдештерге даярдоодо финансылык жактан кыйынчылыктар бар экенин белгилеген.
Эске сала кетсек, учурда өлкөнүн Олимпиада оюндарына төрт жолдомосу бар. Биринчи жолу суучул Денис Петрашов алса, кийинки лицензияга жөө күлүк Юлия Андреева ээ болгон. Ал эми соңку жолдомолорго балбандар Атабек Азисбеков менен Айсулуу Тыныбекова татыды.