БИШКЕК, 21-cен. — Sputnik. Талас облусунда өтүп жаткан Улуттук көчмөндөр оюндарынын көк бөрү мелдешинде Талас облусу үчүнчү оорунду алды.
Аталган команда бүгүн Бишкек шаарынан келген улакчылар менен беттешти.
Оюндун биринчи бөлүгү 4:0 эсеби менен Таластын пайдасына чечилди. Экинчи бөлүктө да Бишкек эсеп санын ача алган жок, андан ары жогорулап 8:0 менен бүттү. Үчүнчү бөлүгүндө гана эки салым жасоого үлгүрдү.
Натыйжада 11:2 эсеби менен Талас облусу жеңишке жетип, 3-орунду камсыздады.
Мындан соң Чүй облусу менен Ош облусунун командалары финалдык беттешке чыгат.
Көк бөрүнүн жалпы байге фондусу — 800 миң сом.
Ал төмөндөгүдөй бөлүнөт:
- 1-орунга — 300 миң сом;
- 2-орунга — 200 миң сом;
- 3-орунга — 100 миң сом;
- 4-орунга — 50 миң сом;
5-9-орундарга 30 миң сомдон берилет.