БИШКЕК, 20-сен. — Sputnik. Лейлек районунун Кулунду айыл өкмөтүнө караштуу Максат орто мектебинин окуучуларына психологиялык жардам көрсөтүлүп жатканын Билим берүү жана илим министрлигинен кабарлашты.
Маалыматка ылайык, чек арада жайгашкан айылдын мектебине психолог менен райондук билим берүү бөлүмүнөн атайын адис жиберилген.
"Кыргыз-тажик чек арасындагы соңку окуялардан кийин окуучулар арасында олуттуу стресске кабылгандар жок. Ата-энелерде бир аз чочулоо байкалат", — деп айтылат билдирүүдө.
Ал ортодо чек арадагы чырдан улам мектепке келтирилген материалдык зыян эсептелип, акт түзүлдү. Чыгым 129 миң 500 сом деп аныкталды.
Эскерте кетсек, кыргыз-тажик чек арасындагы чыр 16-сентябрь күнү кечке жуук чыгып, ок атылып, натыйжада Кыргызстандан бир жоокер каза тапкан. 13 киши жарадар болуп, 10у Бишкекке алып келинген. Ал эми Тажикстандан үч аскер кызматкери набыт болгону айтылган.