БИШКЕК, 19-сен. — Sputnik. Жогорку Кеңештин төрагасы Дастан Жумабеков кыргыз-тажик чек арасындагы абалды жабык эшик артында кароону сунуштады. Спикер буга Конституциядагы берене жол берерин жүйө келтирди.
Исхак Масалиев ачык эле талкуулоо керектигин айтты. Ал буга чейин да чек ара маселелери жабык болуп келип, бүгүнкү абалга келгенин билдирди.
Жыйынтыгында депутаттар добуш берип, жыйын жабык өтмөй болду.
Белгилей кетсек, 16-сентябрь күнү кечке жуук кыргыз-тажик чек арасында чыр чыгып, коңшу өлкөнүн чек арачылары Максат жана Сай бекеттерине ок аткан. Анын кесепетинен бир жоокер каза таап, 13 киши жарадар болгон. Алардын ону Бишкектеги Травматология жана ортопедия борборуна алып келинсе, үчөө Лейлектеги ооруканада калды.
Ал эми кечээ кечинде тажикстандыктар чырга себепкер болгон курулушту токтоткону белгилүү болду.
Биздин Telegram-каналга жазылыңыз.