БИШКЕК, 19-сен. — Sputnik. Бишкектин Энвер Гареев атындагы ботаникалык бакта биринчи жолу климаттык фестиваль өтөт. Бул тууралуу мэриядан билдиришти.
Аталган фестиваль 20-сентябрда саат 15.00дө башталат.
"Жашоо климаты" деп аталган долбоордун алкагында борбор калаага төрт градусник коюлган. Анда 1960-жылдан бери жылдык орточо температура (1,25 градуска көтөрүлгөн) кандай өзгөргөнү жана чара колдонбосо кесепети кандай болору көрсөтүлгөн. Тилекке каршы, Кыргызстанда бул кылымдын аягында абанын температурасы +4...+6 градуска өсөт. Градусниктер мэриянын алдында, Түштүк дарбаза аймагында, "Ала-Тоо" аянтында жана "ГУМ" соода борборунун аймагына коюлган", — деп айтылат маалыматта.
Фестивалда 30дан ашуун бизнес-коомчулугунан турган туруктуу өнүгүү үчүн жашыл альянстын жана айлана-чөйрөнү коргоо тармагындагы коомдук уюмдардын мүчөлөрү климатты жөнгө салууга багытталган иш-чараларды өткөрөт.
Белгилей кетсек, 20-27-сентябрь күндөрү дүйнө боюнча климатты сактоо жумалыгы өтөт. Бул күндөрү 150 өлкөнүн жашоочулары экологияны коргоо максатында көчөгө чыгып түрдүү иш-чараларды уюштурат.
Биздин Telegram-каналга жазылыңыз.