БИШКЕК, 18-cен. — Sputnik. Кыргызстандын Куралдуу күчтөрү Балыкчыдагы "Эдельвейс" полигонунда "Борбор-2019" аталышындагы командалык-штабдык ачык стратегиялык машыгууларды өткөрүп жатат.
Аскердик машыгуулар 16-сентябрда башталып, 21ине чейин уланат. Ага Кыргызстан, Казакстан, Өзбекстан, Пакистан, Индия, Кытай, Россия мамлекеттери катышууда. Аскердик машыгууга 130 миң адам тартылары айтылды. Мындан тышкары, 20 миң аскер техникасы жана курал-жарак, 600 учуучу аппарат болот.
"Борбор-2019" аскердик машыгуунун алкагында өнөктөш мамлекеттердин аскерлери биргелешип Борбор Азияда стратегиялык багыттагы аскердик коопсуздукту камсыздоо жана эл аралык терроризмге каршы күрөшү тапшырмаларын аткарат.
Машыгуунун башкы максаты — заманбап шартта согуштук аракеттерди өздөштүрүү, өнөктөш мамлекеттердин аскерий органдарынын биргелешип ыкчам чара көрүү аракеттерин жогорулатуу. Жыйынтыктоочу этабына КР Куралдуу күчтөрүнүн Башкы штабынын жетекчилиги катышары пландалууда.