БИШКЕК, 17-сен. — Sputnik. Ысык-Көлдүн Ак-Суу районунда катуу шамалдан жабыркап ооруканага түшкөн Мирлан Теңизбаев эсине келбей дүйшөмбү күнү каза тапканын район акими Акылбек Түкөбаев билдирди.
Эскерте кетсек, кырсык 10-сентябрь күнү болгон. Катуу шамал 40тай турак үйдүн чатырын учуруп, заводдо иштеген эки кишинин башына шифер тийген. Бирөө медициналык жардам алып үйүнө чыгарылса, Мирлан Теңизбаевдин жаракаты оор болгондуктан, реанимацияга түшкөн. Жасалма дем алдыруу аппаратына туташтырылган бейтапка Бишкектен дарыгерлер барып, башына операция жасашкан.
"Жаракат алган бала, тилекке каршы, кечээ саат 15.00дөрдө эсине келбеген боюнча жандандыруу бөлүмүндө көз жумду. Үч кызы бар эле. Заводдо атасынын ордуна кароолчу болуп иштеп жатканына үч айдын жүзү болгон", — деди аким.
Катуу шамал Каракол шаарында да катталган. Келтирилген чыгым 1,4 миллион сом деп бааланууда. Шаар депутаттары чукул жыйынга чогулуп, үйлөрдүн чатырын оңдоого 727 миң сом өлчөмүндө каражат бөлүшкөн.