БИШКЕК, 14-сен. — Sputnik. Өзгөчө кырдаалдар министрлиги сентябрдын башында жааган калың кардан улам мал-жандыктары менен жайлоодон түшө албай калган чабандар тууралуу маалымат берди.
Ага ылайык, өлкө боюнча 40 чабан 299 жылкы, 1183 бодо мал жана 25 716 кой-эчкилери менен коопсуз жайга түшүрүлгөн. Алардын ичинен 7 жылкы, 1 уй жана 265 кой-эчки айдап келе жаткан жолдо өлгөн.
Белгилей кетсек, 9-10-сентябрь күндөрү аба ырайы кескин бузулуп, тоолуу аймактарда калың кар жаагандыктан Жалал-Абад, Талас, Нарын жана Чүй облустарындагы жайлоолордо чабандар мал-жандыгы менен калып калган.
Мунун натыйжасында Чүй облусунун Чүй жана Жайыл районунун жайлоолорунан 11 чабан 150 жылкысы, 400 бодо малы жана 4800 кой-эчкиси менен түшүрүлгөн. Анын ичинен 200 баш кой жана 4 жылкы өлгөн.
Нарын облусунун жайлоолорунан 4 чабан 2100 кою, 13 бодо мал жана 60 жылкысы менен кыштоого алып келинген. Анын ичинен 3 жылкы, 1 баш уй өлгөн.
Жалал-Абад облусунун Токтогул, Тогуз-Торо, Сузак жана Аксы районунун жайлоолорунан 18 чабан 16 616 кой-эчки, 500 бодо мал жана 55 жылкы кооптуу аймактан түшүрүлгөн. Анын ичинен 65 кой өлгөн.
Талас облусунун Талас районунун жайлоолорунан 7 чабан болжол менен 2200 кой, 270 бодо мал жана 34 жылкысы менен түшүрүлгөн.
Биздин Telegram-каналга жазылыңыз.