Жогорку Кеңештин жалпы жыйынында Кожобек Рыспаев акыркы кезде профсоюздардын айланасында болуп жаткан иштер тууралуу маселе көтөрдү. Эл өкүлү профсоюздар алар тууралуу мыйзам жазып жаткан депутаттардын кабинеттерине чейин кирип келип, ортого тааныш-билиштерин салып жатканына нааразы.
"Профсоюз деген бизде монстр чыкты. Мыйзам жазып жатсак депутаттардын кабинеттерин кыдырып жүрүшөт. Менин колумда ушундай чакырыктар бар. Койлор деп жатышат. Ачык эле телефон номерлерин коюп жазып жатат. "Кутман таң, жакында ушундай койлорду шайлайбыз. Профсоюздар жөнүндө жаңы мыйзам жазып жаткандарды жоготуш керек. Ошолордун 2020-жылкы шайлоодогу тизмеде болбошуна аракет кылыш керек. Бул биздин колдон келет, биз жеңебиз" деп жатат", — деп депутат тарап жаткан чакырыкты жалпы жыйында окуп берди.
Мындан улам аларга чара көрүү керектигин айтып, вице-спикер Мирлан Бакировго кайрылды.
Ал ортодо профсоюздар мамлекеттин мүлкүнүн баарын сатып жатканын сындап, бул боюнча өкмөткө тапшырма берүү керектигин кошумчалады.
Биздин Telegram-каналга жазылыңыз.