Мал чарбачылыгын жүргүзүүдө төрт түлүк кандайдыр бир ооруга чалдыккан учурда эмес, ошол дарттын алдын алуу иш-чараларын өз убагында жасап туруу зарыл. Бул тууралуу Дария Тогузбаева Sputnik Кыргызстан радиосунун таңкы эфиринде маек куруп жатып билдирди.
Анын айтымында, малды жакшы дарылаган эмес, алдын алуу иш аракеттерин малчыга жеткиликтүү түшүндүргөн ветеринарды мыкты деп атоого болот.
"Мал кармоодо аны багуу гигиенасын сактоо, рационуна көңүл буруу, башкысы профилактикалык эмдөөлөрдү убагында жүргүзүп туруу зарыл. Ошондо гана фермерликти стабилдүү киреше катары кароого болот. Малга ылаң тийген учурда ал кирешеден эле ажыратпай, ээсине түйшүк да жаратат. Ооруга чалдыккан малдан коомчулук жапа чегип калбашы үчүн фермер болгон аракеттерин жасайт. Андыктан, мал багууда бир гана кирешени эмес, жоопкерчиликти да унутпаш керек", — деди Тогузбаева.
Адис өлкөдө малдын жугуштуу ооруларынын алдын алуу үчүн жылына эки ирет вакцинациядан өткөрүү иштери жүрүп турарын кошумчалады.