БИШКЕК, 7-сен. — Sputnik. Борбор калаада милиция кызматкерин сүзүп кеткен шектүү жаран кармалды. Бул тууралуу шаардык милициянын маалымат кызматы кабарлады.
Окуя кечээ, 6-сентябрда, болжол менен саат 15:00дөр чамасында болгон. Анда ЖКККББнын У.А. аттуу кичи инспектору, милициянын старшинасын коюп кетишкен.
"Mazda 626 үлгүсүндөгү автоунаанын айдоочусу 7-апрель көчөсү менен түштүк тарапты көздөй баратып жол эрежесин бузат. Аны Жол кайгуул кызматынын өкүлү токтотсо баш ийбей, автоунаанын маңдайында турган инспекторду сүзүп белгисиз тарапка качып кеткен", — деп жазылат маалыматта.
Кылмышка шектелип 26 жаштагы А.А. аттуу жаран кармалып, убактылуу кармоочу жайга киргизилди. Аталган факт Кылмыш кодексинин 226-беренеси "Бейбаштык" боюнча Кылмыш менен жоруктардын бирдиктүү реестрине катталган.