БИШКЕК, 5-сен. — Sputnik. Кой-Таш окуясынан кийин Бишкек шаарында болгон башаламандык учурунда калаадагы банктардын биринин айнегин талкалады делген кыз кармалды. Бул тууралуу ШИИББден билдиришти.
Маалыматка караганда, 9-августта Биринчи Май райондук ички иштер бөлүмүнө банктын Ж.А. аттуу өкүлү арыз менен кайрылган. Ал укук коргоочулардан кеңсенин айнегин талкалап кеткен белгисиз кызга чара көрүүнү өтүнгөн.
"9-августка караган түнү саат 00.00 чамасында 20-25 жаштар чамасындагы кыз тартип бузуп, Панфилов менен Киев көчөлөрүнүн кесилишинде жайгашкан банктын филиалынын айнегин талкалап кеткен", — деп айтылат маалыматта.
Буга чейин интернет айдыңында банктын айнегин таш менен уруп талкалаган кыздын видеосу тараган. Ал ошол жердеги адамдардын "эмнеге мындай кылдың?" деген суроосуна "жөн эле" деп жооп берген.
Ыкчам-издөө аракеттеринин жыйынтыгында борбор калаанын аймагынан 17 жаштагы А.А. аттуу кыз кармалып, Биринчи Май райондук ички иштер бөлүмүнө жеткирилди.
Учурда тергөө иштери уланып жатат.