БИШКЕК, 2-сен. — Sputnik. Бишкек мэриясынын Муниципалдык менчик башкармалыгынын жетекчиси Нурдин Тынаев жакында эле алдамчылыкка барды деп шектелип, кийин качып кеткен кызматкердин кыңыр иштерин аныктаган. Бул тууралуу мэриянын маалымат кызматы билдирди.
Ага ылайык, шектүү кызматкер июль айынын ортосунда башкы адис болуп ишке орношуп, документтерди жасалмалап жарандардан акча алган.
Ал муниципалдык менчикти сатуу боюнча аукциондун протоколун жасалмалап, Москва көчөсүндө жайгашкан 8 батирди "сатып" жиберген. Анын акчасын алып из жашырып кеткен.
Тынаев алдамчылык схемасын байкап калып милицияга кайрылган. Шектүү кызматкерге издөө жарыяланды. Ал адамдын муниципалдык башкармалыкта болгону бир жарым ай гана иштегендиги айтылды.