Бүгүнкү күндө ички мигранттардын көбү баласын бала бакчага берүүдө электрондук кезекке турбай жатат. Бул тууралуу Чынара Майтикова Sputnik Кыргызстан радиосунун "Ачык кеп" программасында маек куруп жатып билдирди.
Анын айтымында, айрым ата-энелердин "тааныш-билиш аркылуу баламды бала бакчага киргизип алам" деген ою жаңылыштык.
"Ички мигранттар баласын бала бакчага киргизүү үчүн электрондук кезекке туруу керектигин билбей жатышат. Алардын арасында тааныш-билиш аркылуу киргизем дегендер да бар. Мындай аракет текке кетерин түшүнбөй жатышат. Былтыр бир шаар тургуну электрондук кезекке тургандан кийин эртеси эле баласын кабыл алган учур болду. Ошондуктан электрондук кезекке туруу ата-энелердин өзүнө эле жакшы", — деди Майтикова.
Ал Бишкек шаарындагы төрт райондун ичинен Октябрь районунда бала бакчалар көбүрөөк экенин кошумчалады.