БИШКЕК, 1-сен. — Sputnik. Ала-Арча капчыгайында чыккан өрт боюнча сотко чейинки тергөө амалдары башталды. Бул тууралуу Чүй облустук ИИББинин маалымат кызматынан кабарлашты.
Өрт 31-август күнү саат 14.00дөр чамасында чыккан. Тилсиз жоо Бишкек шаарынын түштүк тарабындагы тоо этектериндеги кургак чөптөн тутанып, саат 20.15те чектөөгө алынган. Өзгөчө кырдаалдар министрлигинен өрттү өчүрүүгө 199 куткаруучу тартылып, азыркыга чейин иш улантылып жаткандыгын билдиришти.
Чүй облустук ИИББинин маалыматына ылайык, буга чейин өрткө каршы жумуштарга милиционерлер жана жергиликтүү тургундар болуп 750дөн ашык адам тартылган.
Өрттөн жабыркагандар жок. Кылмыш-жаза кодексинин 287-беренеси ("Токойду жок кылуу же бүлүнтүү") боюнча сотко чейинки тергөө башталып, тиешелүү экспертизалар дайындалды.