БИШКЕК, 24-авг. — Sputnik. Кытайдагы Цзянси провинциясынын жашоочусу отуз жыл бою мээсинде он сантиметрлик курт бар экендигин билбей жашап жүргөнүн РИА Новости жазды.
Эркек кишинин башы 1989-жылдан тарта (агезде 29 жашта болчу) ооруп баштаган. Биринчи жолу илдети карта ойноп жатканда кармаганын айткан. Анда буту-колу калчылдап, оозунан көбүк атып, эси ооп калган.
Ошондон бери ден соолугу жакшырбай койгон. Дарыгерлерге кайрылганы менен майнап чыккан эмес.
Ушул жылдын июль айында магниттик-резонанcтык томографияга түшкөндө мээсинде 10 сантиметрлик курт бар экендиги аныкталган. Дарыгерлер аны операция жолу менен алып чыгышкан. Ак халатчандар курт адамдын ичине булактын суусу аркылуу кирип кетиши мүмкүндүгүн айтышкан.