БИШКЕК, 20-авг. — Sputnik. Ысык-Көлдөгү Чоң-Ак-Суу капчыгайында токойлор кыйылып жатат деген маалымат туура эмес. Бул туурасында Айлана-чөйрөнү коргоо жана токой чарба мамлекеттик агенттигинин маалымат кызматынан кабарлашты.
Билдирмеге караганда, аталган агенттиктин Ысык-Көлдөгү аймактык башкармалыгы токойго барып, мыйзамсыз кыйылып жаткан бактарды тапкан эмес.
"2019-жылдын май айында жарандык активисттер токойлор кыйылып жатканы боюнча маалымат таратып, сүрөттөрүн жарыялашкан. Буга байланыштуу атайын комиссия түзүлгөн. Бирок токойлор кыйылган факты аныкталган жок. Болгону Чоң-Ак-Суу капчыгайында былтыр декабрь айында катуу шамал болуп 215 даана Тянь-Шань карагайы кулап калганы белгилүү болду. Активисттер так ошол сүрөттөрдү жарыялашыптыр", — деп айтылат маалыматта.
Мындан тышкары, үстүбүздөгү жылдын 25-февралында Токой экосистемин өнүктүрүү департаменти токойду кыйрап калган бактардан тазалоо боюнча чечим чыгарган. Бирок тазалоо иштери туристтик сезон аяктаганча токтотулган.
Айлана-чөйрөнү коргоо жана токой чарба мамлекеттик агенттиги жарандарды жана активисттерди такталган маалыматтарды гана таратууга чакырат.