БИШКЕК, 20-авг. — Sputnik. Америкадагы Техас штатынын жашоочусу баласын дарыгерге эч себепсиз 320 жолу алып барган күнөөсүн мойнуна алды. Бул туурасында Fox 5 интернет порталы жазды.
35 жаштагы Кэйлин Боуэн-Райттын сот отуруму узаган аптада Далласта өткөн. Аял 2009-2016-жылдары өзүнүн он жаштагы уулун 323 жолу ооруканага алып барып, зарыл болбогон кароолордон, текшерүүлөрдөн өткөрүп турган. Соттун маалыматы боюнча, балага 13 ирет операция жасалган.
Соттун өкүмү октябрь айында чыгары жана аял 20 жылга чейин эркинен ажыратылышы мүмкүн экендиги айтылат. Баланын атасы Райан Кроуфорд аны жалгыз тарбияламай болгон.
Маалыматта аял Мюнхгаузен синдрому менен жабыркашы мүмкүн экени белгиленет. Мында адам өзүн же башка эле кишини дартка чалдыккан деген ойдо медициналык жардам алууга мажбурлайт.