БИШКЕК, 19-авг. — Sputnik. Казакстандын жоокерлери Кыргызстанда жоголуп кеткен альпинисттерди издеп жатат. Бул тууралуу Sputnik Казакстан Коргоо министрлигине шилтеме берип жазды.
Алматынын акими Бакытжан Сагинтаевдин айтымында, бүгүн, 19-августта, кыргыз тараптагы Иле Ала-Тоосунда казакстандык альпинисттердин тобу жоголуп кеткен. Хан-Теңир тоосунан издөө иштери аткарылып жаткан жерге тик учак менен куткаруучулар жөнөп кетти.
Sputnik Казакстан агенттигинин жазганына караганда, үч адам жоголгон: Мурат Отепбаев, Андрей Корнеев жана Александр Чечулин. Акыркысы каза таап калышы ыктымал деген божомолдор айтылууда.
Коңшу өлкөнүн Коргоо министрлиги аба ырайына байланыштуу издөө иштери оорлоп жатканын кабарлады. Мындай бийиктикте иштөө үчүн климатка көнгөн куткаруучуларды жиберүү зарылдыгы бар. Мындай группадагы куткаруучулар альпинизм боюнча "Эльбурс шакеги 2019" эл аралык сынагына катышкан.
Кыргызстандын Башкы штабы Sputnik Кыргызстан агенттигине бир аздан кийин маалымат берүүнү убадалады. Ал эми КР ӨКМи альпинисттер акыркы жолу 15-августта байланышка чыкканын маалымдап, туркомпания тарабынан билдирүү түшпөгөнүн билдирди.